Иә, өткен дүйсенбіде халқымыз үшін, барша дін мұсылман баласы үшін аса қастерлі де ізгілікті Құрбан айт біздің кең-байтақ Отанымызға жыл аралата тағы да қайта айналып соқты. Сөйтіп, иман сағындырған, салауатқа бағынған, татулық нұры ұйыған миллион сан жүректерге көзайымдай боп келіп жетті. Зәулім де аумақты мешіттің іші-сыртына, атшаптырым ауласына хақ діннің жүрегі жұмсақ құлдары сыймай кетті десек, артық айтқандық емес. Осыған әрі сүйініп, әрі қуандық. Таңертеңнен Орталық мешітке жиналған ондаған мың адам бір кісідей жүздерін құбылаға қарата Айт намазын оқып, Раббыға құлшылық етті. Бас мүфти, шейх Әбсаттар қажы Дербісәлінің уағыз-құтбасын ықыласпен тыңдап, берген батасын саналарына құйып, зерделеріне тоқыды. Сол сәтте олардың баршасы бір деммен тыныстап, Жаратушы Иеден елімізге, халқымызға, Отанымызға, мемлекетімізге, діндес бауырларымызға игі тілек тілеп, одан кейін Алланың разылығы үшін Ибраһим пайғамбар заманынан бері жалғасып келе жатқан, жол-дәстүрге айналған уәжіп бойынша құрбандықтар шалына бастады. Бұл құрбандық малдарының еті Алматыдағы қарттар мен балалар үйлеріне, кембағалдар мекемелеріне, тұрмысы төмендер мен мүсәпірлерге таратылып, қайырым шарапаты да молынан тигізіліп жатты.
Осындай сауапты амалдар мен шапағатты құлшылық үстінде: “Игі істің басына, жақсы келер қасына” дегендей, Мемлекет басшысының Орталық мешітке ат басын тіреп арнайы келуі, ата-баба рухына Құран бағыштатып, жиналған жұртты риясыз құттықтауы да оларды айрықша қуанышқа бөледі.
– Барлық мұсылмандарға бүгінгі күні бақ-береке, шапағат, отбасына тыныштық, денсаулық, барлық жақсылықтарды тілеймін. Біздің елімізде ұмытыла бастаған дініміз де, діліміз де, тіліміз де, халқымыздың сән-салтанаты да тәуелсіздіктің арқасында орнына келіп жатыр. Ел бойынша дін ғимараттары, мешіттер салынуда. Үлкеніміз де, ортаншымыз да, жасымыз да мешітке келетін болдық. Иманымызға оралып жатырмыз. Менің білуімше, Қазақстанның барлық мешіттерінде халқымыз Құран Кәрімде айтылғандай, Мұхаммед пайғамбарымыздың қағида-хадистерін орындап, елдің бірлігін тілейді, тәуелсіздік бақытының баяндылығын тілейді. Мұсылман діні елді ұлтына, нәсіліне, тіліне қарап бөлмейді. Ол бүкіл адамзаттың баласын бауырым деп санайды, ешкімге жаманшылық жасамайды. Бір адамды өлтірген бүкіл адамзатты өлтірген болып есептеледі. Ендеше, мұсылмандық жолымен тура жүрейік, ешқандай бұрмалаушылыққа, күпірлікке бармау керек. Біздің еліміз тәуелсіздігін нығайтып, 17 жасар жігіт жасына келді. Кездескен қиыншылықтардың орайын таптық. Қартайған жоқпыз, ортайған жоқпыз. Бірақ әлде де төңірегімізде қиыншылықтар бар. Соларды да жеңіп шығу үшін біздің бірлігіміз керек. Қазіргі істеліп жатқан істер, менің қызметім болашақтың қамын көздейді. Осы жолда бір-бірімізден шапағатымызды, көмегімізді аямайтын болайық. Барлық мұсылман қауымына бірлік тілеймін, бір-бірімізге жақсылығымыз мол болсын. Жүрегіміз таза болсын, түсініспеушіліктен ада болсын. Имандылық ұялаған тәуелсіздігіміз ұзағынан сүйіндірсін! – деді Нұрсұлтан Әбішұлы.
Шынында да соңғы жылдары халқымыздың Елбасы айтқан имандылыққа бет бұрғаны байқалады. Соның ішінде мешіттерге келушілердің дені, басым көпшілігі жастар екендігі дәтке қуат болғандай. Өйткені исламды уағыздау, үгіт-насихат, ағартушылық қызмет күшейе түскен. 47 мың таралыммен “Ислам және өркениет” газеті, “Иман” журналы шығып келеді. Алматыда “Нұр-Мүбәрак” Египет Ислам мәдениеті университеті жұмыс істейді. Имамдар білімін жетілдіретін Ислам институты ашылған. Облыстарда 6 медресе қатарға қосылған. Баспасөзде дін исламның басты уағыздаушыларының бірі болып отырған Бас мүфтидің өзі дінаралық достыққа да үлкен мән береді. Қазір елімізде 2300-ге тарта мешіт болса, жақында ғана бір Алматының өзіндегі 28-ші мешіт хақ жолындағыларға есігін ашты. Осынау сауапты күндерде Мекке-Мединеге қажылыққа аттанған бауырларымыз да Арафатта болып, одан Меккеге оралып, қажылық парыздарын үлгілі өткізіп жатқандығын хабарлапты. Осылайша мұсылмандардың ұлық мерекесі – Құрбан айты Қазақ елінде өз дәрежесінде ұлықталды.
Иә, өткен дүйсенбіде халқымыз үшін, барша дін мұсылман баласы үшін аса қастерлі де ізгілікті Құрбан айт біздің кең-байтақ Отанымызға жыл аралата тағы да қайта айналып соқты. Сөйтіп, иман сағындырған, салауатқа бағынған, татулық нұры ұйыған миллион сан жүректерге көзайымдай боп келіп жетті. Зәулім де аумақты мешіттің іші-сыртына, атшаптырым ауласына хақ діннің жүрегі жұмсақ құлдары сыймай кетті десек, артық айтқандық емес. Осыған әрі сүйініп, әрі қуандық. Таңертеңнен Орталық мешітке жиналған ондаған мың адам бір кісідей жүздерін құбылаға қарата Айт намазын оқып, Раббыға құлшылық етті. Бас мүфти, шейх Әбсаттар қажы Дербісәлінің уағыз-құтбасын ықыласпен тыңдап, берген батасын саналарына құйып, зерделеріне тоқыды. Сол сәтте олардың баршасы бір деммен тыныстап, Жаратушы Иеден елімізге, халқымызға, Отанымызға, мемлекетімізге, діндес бауырларымызға игі тілек тілеп, одан кейін Алланың разылығы үшін Ибраһим пайғамбар заманынан бері жалғасып келе жатқан, жол-дәстүрге айналған уәжіп бойынша құрбандықтар шалына бастады. Бұл құрбандық малдарының еті Алматыдағы қарттар мен балалар үйлеріне, кембағалдар мекемелеріне, тұрмысы төмендер мен мүсәпірлерге таратылып, қайырым шарапаты да молынан тигізіліп жатты.