Негізгі бет » 2008 » Желтоқсан » 14 » 13.12.2008. Қазақстан әлемде бірінші болып ұялы телефон арқылы ақша аудару қызметін іске қосты – Асқар Құсайынов
13.12.2008. Қазақстан әлемде бірінші болып ұялы телефон арқылы ақша аудару қызметін іске қосты – Асқар Құсайынов
10:36
АЛМАТЫ. Желтоқсанның 13-і. ҚазАқпарат /Ерлік Ержанұлы/ - «Қазақстан әлемде бірінші болып ұялы телефон арқылы ақша аудару қызметін іске қосты. Бұл біздің Тәуелсіздік мерекесі қарсаңында қазақстандықтарға тартқан сыйымыз». Бұл туралы «Қазақстан Халық банкі» АҚ басқарма төрағасының орынбасары Асқар Құсайынов Алматыда өткізген баспасөз мәслихатында айтты, деп хабарлайды ҚазАқпарат. «Мобильдік аударым» қызметін «Қазақстан Халық банкі» Visa халықаралық төлем жүйесімен бірлесіп жүзеге асырып отыр. Ол әлемнің төрт валютасы: теңге, еуро, доллар және рубльмен жасалады. Асқар Құсайыновтың айтуынша, «мобильдік аударымды» «Банкомат арқылы «Visa-ның» бір карточкасынан екінші карточкасына ақша аудару» деген қызметтің жалғасы ретінде қарастыруға болады. Ол республикада 2007 жылы наурыздың 30-ында іске қосылған. «Sms-хабарламасының көмегімен бір-біріне ақша жөнелту сервисіне банктің өз қызметкерлері биыл қарашаның 5-інен бастап қол жеткізе бастады. Қазіргі уақытта банк апплеті Beeline операторының SIM-карталарында орналастырылған. Келесі жылдың алғашқы тоқсанында ол K-Cell, Activ абоненттері үшін де мүмкін болады. Beeline абоненттері өзінің SIM-картасын банк мәзірі орналастырылған SIM-картаға кез-келген бөлімшеден тегін ауыстыра алады», дейді А. Құсайынов.
