“Бесіктегі баланың күлгенін көрген бір мұрат, алдынан түсіп ананың жүргенін көрген бір мұрат”, дейді халық даналығы. Мына ғаламда ана мен баланың жүзін кірбің шалмаса, жадырай күліп, жабырқамай жүрсе, дүниенің түгелдігі сол емес пе?! Тәуелсіздігін ту еткен азат елде әр шаңырақ кішкене сәбидің уіліне, былдырлаған үніне, қаз-қаз басқан қадамы мен оның әр қуанышына толып жатса, ата-ана мен ата-әженің, туыс-туғандардың қуанышы да сол емес пе?!
Биылғы жыл елімізде халық санағы жүргізіледі. Өткен жылға көңіл тоқ. Республика бойынша қаңтар мен қазан айлары аралығында 305357 Қазақстан азаматы дүниеге келіпті. Әр отбасыға қуаныш сыйлаған осы сәбилердің 66027-сі Оңтүстік Қазақстан облысында, 33274-і Алматы облысында туып, 23612 сәби Жамбыл облысының тұрғындарының санын көбейткен. Ал елордамыз Астана қаласының перзентханаларында 12898 нәрестенің кіндігі кесілген. Әзірге мәліметтері қолға түсіп үлгермеген қараша мен желтоқсан айларында қанша шарана жарық дүниенің есігін ашып, қанша отбасы қуанышқа кенелді десеңізші.
25 ақпан мен 6 наурыз аралығында Біріккен Ұлттар Ұйымының әлемдік бағдарламасы негізінде өткізілетін халық санағына әр қазақтың “қанша болыппыз өзі?” – деп елеңдері анық. Елеңдеген құлаққа ел болуда қатарымыз көбейіпті деген сөз майдай жағар-ақ.
Өткен жылдың қазан айында Қазақстан Республикасының Статистика жөніндегі агенттігі 9 мыңнан астам тіркеуші жүргізген алдын ала санақтың нәтижесін жария етті. Бұйыртса, алдағы санақта Қазақстан халқы 17 миллионды еңсеретін түрі бар. Көбеймесек көсегеміздің көгемейтіндігі анық. Сол себептен де Елбасы демографиялық мәселелерді үнемі назарында ұстайды. Көп балалы отбасыларға әлеуметтік көмектер көрсетіліп, бала туған анаға деген төлемақы, жөргекпұлдың деңгейі де өткен жылда өсті. Мемлекет өзінің кішкентай азаматының өмірге келгеніне қуанып, ата-анасына перзентің несібелі болады деген ишаратын жеткізді. “Бір қозы артық туса, шөптің басы айыр туады” дейтін кеңдігі қанында бар халық несібесімен туып жатқан балдырғанға қалай қуанбайды. Шын қуаныш ешқашан жеке пенденің еншісі болған емес. Жалғыздың қуанышы жалпақ жұртты қуандырмайды ма, ал қуаныш неғұрлым көпті сүйіндірген сайын оның бағасы да салмақтана береді.
Биылғы туған сиыр жылында іңгәлаған сәбилер қатары артып, толған айдай торсық шеке балдырғандар саны көбейе түссе екен. Жылдан жылға, айдан айға санымыз самғап, қатарымыз қабырғаланып, көңіліміз көктемдей көркейіп, жанымыз жадырап, туымыз тұғырланып, елдігіміз еңселеніп, айбынымыздың асуы қазақстандық 17 миллионның тілегі емес пе. Әрбір туған бала іргелену мен іріленуге, бәсекелестікте бағы озғанның мерейі үстем болған ғаламда мақсатқа тезірек жетуге алып келеді. Ғалымдар сан көбеймей сапаға да қол жетпейді дейді. Ендеше 2009 жылы да торсықшекелер көбейсін!
“Бесіктегі баланың күлгенін көрген бір мұрат, алдынан түсіп ананың жүргенін көрген бір мұрат”, дейді халық даналығы. Мына ғаламда ана мен баланың жүзін кірбің шалмаса, жадырай күліп, жабырқамай жүрсе, дүниенің түгелдігі сол емес пе?! Тәуелсіздігін ту еткен азат елде әр шаңырақ кішкене сәбидің уіліне, былдырлаған үніне, қаз-қаз басқан қадамы мен оның әр қуанышына толып жатса, ата-ана мен ата-әженің, туыс-туғандардың қуанышы да сол емес пе?!