Қазақстанның әлемдік діндердің орталығы боламыз деп жанталасуы бекер болмай шықты. Оған мықты қазық бар екен. Қазық болғанда қандай! Забур, Тәурат, Інжіл, Құран Кәрімде бірдей айтылатын Нұһ пайғамбар жер жәннаты Жетісуда, онда да тура осы Алматыда жерленген болып шықты. Бұрын Сақ-Үйсін күнбиінің көсемі санап жүрген Қажы баба дегенің енді анау-мынау емес, Нұһ пайғамбарға айналып шыға келген. Оны біз Билеуші-Пайғамбар-Президент деген аты бар Балтабай Рахымжановпен тілдескенде бір-ақ білдік. «Даудың басы – Дайрабайдың көк сиыры» демекші, бәрі Балтабайдың 1995 жылы Алматының түстік жағындағы бұрын «Ремизовка», қазір «Көктем» деп аталатын санаторийдің маңындағы Ерменсай деген дөңестен үш метр тереңдіктен басында қола шырағданы бар адамның қаңқа сүйегін тауып алуынан басталды. Қазба-мұраның табылуының өзі жатқан бір ертегі. Оны Балтабай Рахымжановтың өз аузынан естиік. Ол кісі бізге бүй деді: «Мәскеуде бизнеспен айналысып жүргенімде, түсімде бір ақ киімді адам «Алматыдағы саяжайыңдағы жеріңді қаз, үлкен қазынаға кезігесің» деп қайта-қайта аян берді. Ол бес сотық жерде інім Құрманғазы тұратын. Содан үйдің алдынан жертөле қазып жатқанымызда, ұзындығы 1 метр 48 сантиметр алып адамның сүйегін, таза қоладан жасалған биіктігі жарты метрлік үш аяқты шырағдан тауып алдық. Мұны сол кезде-ақ «Хабар» арнасы кешкі жаңалықтарында бүкіл республикаға көрсетті. Марқұм тарихшы Манаш Қозыбаев пен археолог Карл Байпақов зерттеп, «ұзындығы екі метрден асатын бұл адам біздің бабаларымыз сақ-үйсін тайпаларының өмір сүрген кезімен тұспа-түс, яғни б.д.д. ІІІ-ІІ ғасыр» деген болжам жасады. Сөйтіп, қаңқа сүйек жеті жылдай ғалымдардың зерттеуінде жатты. Бір күні қаңқа сүйек түсіме еніп, «Мен Қажы бабамын. Маған тура 9999 жыл болды, мен сенің Піріңмін, сен менің мұрагерімсің» деп аян беріп, жерлеуімді өтінген соң, сүйекті ғалымдардан алып, 2002 жылы Ремизовкаға жерледім. Әрине, бір қауым жұртты жиып». Балтабайдың айтуынша, ол басында Қажы бабаның басына Қожа Ахмет Яссауидің кесенесінен артық болмаса кем емес зәулім кесене тұрғызу үшін ішінде Асанбай Асқаров, Нұрғиса Тілендиев, Мұхтар Әлиев, Роза Бағланова, Ермек Серкебаев, Асқар Құлыбаев, Салық Зиманов, Бердібек Сапарбаев сынды тұлғалар бар атақты жүз адамға қол қойдырады. «Бұл тізім Елбасының қолына тиіп, содан Президент 24 гектар жер берді. Ол жерді Кошкин дегенге келісімшартқа жалға беріп, өзім Мәскеуге кеттім. Біраз уақыттан кейін келсем, Кошкин менің жерімнің бәрін сатып, өзі Мәскеуге қашып кетіпті. Сөйтіп, ол жерден айырылып қалдым» дейді Балтабай. Ал түркі көсемін Түркістанға апарып та жерлемекші болған екен, ресми органдар рұқсат бермепті. Сонымен, Балтабай саяжайының түбіндегі жекешелендіріп алған көк төбеге жерлеген сүйектің басын қарайтып, темір шарбақпен қоршап, құлпытас орнатып, оған «Қажы баба. Б.э.д. ІІІ-ІV ғасыр. Сақ-үйсін Күнбиі (көсемі). Бүкіл түркі халықтарының ата-тегі. Бабалардың бабасы» деп жазып қояды. Сол тұста жазушы Шерхан Мұртаза «Егемен Қазақстан» газетіне «Аяғыңның астына қара» деген мақала жазады. Қазба мұраны әлемге әйгілі етуді көздеп жүрген азаматқа ақ жол тілейді. «Негізгі айтпағымыз: осы азамат әлгі қазба мұра табылған жердің тура жанындағы төбеге саты салып, төбе үстіне қола шырағданның көп есе үлкейтілген моделін қоладан құйдырмақ. Сонда бұл Ұлы Жібек жолының бойындағы бағалы жәдігерлердің бірі болмақ. «Біздерде мынадай бар, мынадай бар» дер үшін де осындай тарихи ескерткіштер көбейе берсе, Қазақстан туристер, жолаушылар үшін ең көрнекті елге айналмақ... ...Тарихқа жанашыр демеуші Балтабай сияқты азаматқа енді не істеу керек? Оның ақ ниетін іске асыру үшін, Ерменсай төбесіне ескерткіш орнату үшін Үкіметтің рұқсаты керек. Қалың көпшіліктің ризалығы мен батасы керек» деп жазады Шерағаң. Ниет әбден дұрыс, әрине. Бірақ бұл ақ ниеттің басқа жаққа ауып түсерін ол кезде Шерағаң қайдан білсін... Ал енді қаңқа сүйектің бас жағынан табылған қола шырағданға келсек, үш аяқты өрнекті тағанның үстіне қола табақ қойылған. Табақтың жиегін 16 барыс тізбектеліп қоршап тұр. Ал табақтың ортасында сұлап жатқан таутекені екі көкбөрі екі жағынан үңгіп жеп жатыр. Оған екі қарға екі жағынан қарап тұр. Керемет пе, керемет! Қола шырағданның ары қарайғы тағдырын Балтабайдың өз аузынан естиік. Ол кісі бізге бүй деді: «Шырағданды Орталық мемлекеттік музейге өткіздік. Бір күні Мәскеуден келсем, інім «біз өткізген шырағдан музейде жоқ, сатылып кетіпті» дейді. Расында, Орталық музей әкімшілігі ірі шенеуніктердің араласуымен 50 миллион долларға түріктерге сатып жіберіпті. Сол арада Қажы баба түсіме еніп, «сүйек шыққан жерді қаз, тұмар табасың, оны тапқан соң шырағдан қайтарылады, не тілегің де орындалады» деп аян берді. Сол тұмар қазір менің мойнымда. Бұл бойтұмарды генерал Сәт Тоқпақбаев арқылы Елбасыға көрсеттім. Бойтұмарды ұстап көрген Елбасы: «Қола шырағданды тауып, елге қайтарыңдар» дейді. Сонымен, 50 миллион долларды қайта төлеткізіп, шырағданды Орталық музейге әкеліп қойғыздық. Қазір өзіміздің Орталық мемлекеттік музейде тұр. Ал Сәт Тоқпақбаев кейін қақ бөлінген тікұшақтан жұрт апатқа ұшырағанда аман қалды. Ол – осы бойтұмардың арқасы». Қажы баба қалай Нұһ пайғамбар болды? Алматы облысына қарасты Сарыбұлақ совхозында ұзақ жылдар директор болған, КСРО өнертапқышы, Санкт-Петербург халықаралық академиясы акмеология ғылымының академигі, ауылшаруашылық ғылымының кандидаты Сайлыбай Бекболатов: «Мәңгілік қазақ календары» деген кітабында «Нұһ пайғамбардың кемесі Қазығұртқа тоқтаса, өзі қай жерге жерленген?» дей келіп: «Шырағдан айтабағында ашық айналып жүрген 16 барыс Алланың ашық аяттары емес пе? Оның жер жәннаты Жетісуға жерленген алып адамның бас жағына қойылуы нені білдіреді? Сол адам Нұһ (ғ.с.) өзі деуге неге болмасын?» деп, Нұһ пайғамбардың Жетісуда жерленгенін ойша құрылған сөйлемдегі әріптердің орнына құпия сандар қою, яғни формула арқылы дәлелдеуге ұмтылады. Мағынасы сәйкес келетін сөздерді Құран аяттарынан тауып, оның сан мәндерін салыстырып зерттеген ғалымның айтуынша, Алла Тағала Адам атамен қазақ тілінде сөйлесіпті. «Оқымыстылардың ешқайсысы таба алмаған 16 барыстың құпиясын Сайлыбай ағамыз тапты. Бұл Құрандағы «Құдайға құлшылық ет» деген сөз екен. Құран бойынша «Нұһ пайғамбар 950 жыл жасап, жер жаннаты Жетісуда жерленген» деп көрсетілгенін аятпен дәлелдеп отыр. Алматы – Жетісу емей немене? Осыдан кейін бұрын Қажы Бабаның басына Нұһ пайғамбар деп жазып қойдық. Сөйтіп, Нұһ пайғамбар бізден шығып отыр. Жер бетіндегі 6,5 миллиард адамның ішінен маған аян берген соң, мен Нұһ пайғамбардың мұрагері болмай кім боламын?.. Жақында Сарыағашта демалғанымда, мені Қазығұрт тауының басындағы кеменің үстіне шығарды. Көк қошқарды құрбандыққа шалдым. Шырақшысы – белгілі шоумен-әртіс Бауыржан Ибрагимовтың туған ағасы Мұқан Ибрагимов екен. Сол Мұқан: «Балтеке, мен саған бір құдіретті көрсетейін» деді. Сөйтсек, жартастың ішінде Нұһ пайғамбардың үңгірі, оның ішінде намаз оқитын жері, қолының, аяғының ізі бар екен. Тастың жарығынан Нұһ деген жазуды оқуға болады. Жартас бір тақта тасқа ілініп тұр. Егер ол тас кетсе, бүкіл Қазығұрт тауы кетеді. Ал ол таудың астында топан судың көзі бар, ол көтеріледі деген сөз. Жер бетін қайта топан су басады. Бұдан артық қандай дәлел керек? Нұһ пайғамбардың Қазығұрттан 900 шақырым қашықтықтағы Жетісуға келіп жерленуі әбден мүмкін ғой. Енді Нұһтың басына кесене салу үшін менде қазір 800 мың адамның қолы бар. Енді осы тізімді 1 миллион адамға жеткізіп, Президентке, Парламентке, Үкіметке шығамын. Олар Нұһ пайғамбардың зәулім кесенесін салуға көмектеспесе, халыққа саламын. Бұл мәселені Сәт Тоқпақбаев бастаған 10 депутат Кәрім Мәсімовтің алдына қойыпты. Күніне баба басында 10 қой сойылып жатыр. Жұрт құрбандық шалады. Көп бизнесмендер көмектесеміз деп жатыр. Мен алдағы Наурыз тойында бүкіл Қазақстан халқының басты өкілдерін Нұһ пайғамбардың басына жинайын деп отырмын. Наурыз Нұһ пайғамбардан басталған. Тойды осы жерде тойлайық. Тиындары болса, көмектессін. Мен бұл туралы кітап та жазып жатырмын», – дейді Балтабай. Оқырманға түсінікті болу үшін айта кетелік. Балтабай Рахымжанов 1945 жылы Оңтүстік Қазақстан облысының Бәйдібек ауданының орталығы Шаян ауылында туып-өскен. Алматы мал дәрігерлік институтын және аспирантурасын бітіріп, аталған оқу орнында 20 жыл ұстаздық еткен. Биология ғылымының кандидаты атанған. 1990 жылдан 2000 жылға дейін бір ірі фирманың шақыруымен Ресейде жұмыс істеген. Бір жылдай Францияда болады. Ол жақтан келген соң Қазақстан мен Ресей арасында құрылған «Достық» деген кәсіпорынның президенті, «Ынтымақтастық» консорциумының жетекшісі болады. Айтуынша, негізгі үйі Мәскеуде. Қажы баба сүйегін тапқан соң небір «кереметтері» оянып, іскерлігі мен алғырлығы артып жүре берген Балтекең бүгінде елді ертегіге бергісіз әңгімелерімен ұйытып жүр. Нұһ пайғамбардың мұрагері, «Қажы баба» халықаралық қоғамдық қорының президенті, Қазақстан Республикасының Президенттігіне экс-үміткер, Халықаралық «Аль-Халел» ақпараттық агенттігінің президенті, Халықаралық «Қажы баба» қоғамдық қорының президенті, Қазақстанның Ұлттық фермерлер қауымдастығының президенті, «Алаш» халықтық партиясының төрағасы, М.Нострадамус атындағы Халықаралық Академияның академигі, Әлем емшісі атақтары бар.
Түйін: Қазақстан мұсылмандары діни басқармасының діни оқу-ағарту бөлімінің референті Рахымжан Әкімбековтің айтуынша, Балтабайдың ісі Құранға да, Сүннетке де қайшы. Шариғат бойынша негізі жоқ бос әңгіме. Нұһ пайғамбардың қай жерде жерленгендігі Құранда айтылмағандықтан, оны аят бойынша дәлелдеу ешқандай мүмкін емес. Мұның бәрі адамзат тарихына арсыздықпен араласып, бейіт басын бизнес көзіне айналдырған қазақтың төл сектасы. Өзі миы ашып жүрген халықтың одан сайын миын ашыту. Ұлттың берекесін қашыру. Ислам елдеріне елімізді күлкі қылу. Бұған біздің алып-қосарымыз жоқ.
Қазақстанның әлемдік діндердің орталығы боламыз деп жанталасуы бекер болмай шықты. Оған мықты қазық бар екен. Қазық болғанда қандай! Забур, Тәурат, Інжіл, Құран Кәрімде бірдей айтылатын Нұһ пайғамбар жер жәннаты Жетісуда, онда да тура осы Алматыда жерленген болып шықты.