Қарағандыда полиция формасын киген біреу бір топ студентті тақырға отырғызып кетті. Құқық қорғау органының беделіне нұқсан келтіріп отырған бұл оқиғаның жай-жапсары мынадай. Белгісіз біреу тапа тал түсте Қарағанды экономика және статистика колледжінің 12 студентінің қалта телефонын қағып кеткен. Оқиға барысы алаяқтың жүйкесі мықты біреу екенін байқатқандай. Форма киіп, полицейдің образына еніп алған ол дәл оқу процесі қайнап жатқан мезетте колледжге келеді де, топ кураторларының біріне тергеу ісімен жүргендігін, оқу орнындағы студенттер арасында ұялы телефон ұрлығына байланысты күдікті бар екенін айтады. Сезік тудырмау үшін құқық қорғау органы қызметкерінің куәлігін көрсетіп қоюды да ұмытпайды. Сосын «тергеу жұмыстарын» бастап жіберген «полицей» бір топ студенттің телефонын жинап, сөмкесіне салып алады да, топ старостасына өзімен бірге полиция бөлімшесіне баруды бұйырады. «Мәселенің мән-жайын сол жерде анықтаймыз», дейді зілденіп. Полиция бөлімшесіне келген ол кіреберісте студенттің күте тұруын өтініп, өзі кеңсеге еніп кетеді де ғайып болады. Құдды ертегідегідей: «Кірген із бар да шыққан із жоқ». Полиция қызметкерлерінің болжамынша алаяқ қосалқы есіктен шығып жүре берген. Сол кеткеннен мол кеткен. Қазірде куәгерлердің айтуы бойынша, алаяқтың фотороботы жасалып, іздестірілу үстінде. – Іс-әрекетіне қарағанда алаяқ өте әккі біреу. Оқу орны күзетшілері, студенттер, тіпті оқытушылардың алдында еш сезік тудырмай, шаруасын ың-шыңсыз тындырып, сытылып кеткен. Дайындығы күшті. Алайда алаяқтың алысқа ұзап кете алмайтынына сенімдіміз. Бұл полицияның беделіне нұқсан келтірерлік жайт болғандықтан, ішкі істер қызметі іздестіру шараларына бар күшін жұмылдырып жатыр. Бірақ тонаушының полиция формасын киіп келгені анық емес. Куәгерлер оның үстінде қандай форма болғанын, шенінің қандай екенін дәл айта алмай отыр. Мүмкін, ол өрт сөндірушінің немесе күзетшінің қызмет киімі шығар. Ал құжаты жөнінде айтсақ, оның да полиция куәлігі екенін куәгерлердің ешқайсысы сеніммен айта алмады, – дейді ІІД Тіл саясаты және ақпарат басқармасының бастығы Ерғали Қожабеков. Қарағандыда мұндай оқиға бұрын-соңды болмағынымен, ішкі істер органы қызметкерлерінің айтуынша, ұялы телефон ұрлығы қазірде ең көп жасалатын қылмыс түріне айналған. Ақпарат көзі
Қарағандыда полиция формасын киген біреу бір топ студентті тақырға отырғызып кетті.